بالوں کا گچھا

خالد طور 1943 میں مشرقی پنجاب کے قصبے فیروز پور میں پیدا ہوے۔ ان کا بچپن شمالی پنجاب کے ضلع اٹک کے گاؤں کھوڑ میں اور لڑکپن چکوال ضلع جہلم کے مقام بلکسر میں گزرا۔ یہ وہ مقامات ہیں جن کے تفصیلی مرقعے ان کی کہانیوں اور ناولوں میں دکھائی دیتے ہیں۔ انھوں نے ساہیوال اور لاہور میں تعلیم حاصل کی اور پنجاب یونیورسٹی سے صحافت میں ایم اے کیا۔ پیشہ ورانہ زندگی کے آغاز میں خالد طور نے پاکستان ٹیلی وژن میں حالات حاضرہ کے رپورٹر کے طور پر اور روزنامہ نوائے وقت میں سب ایڈیٹر کی حیثیت سے ملازمت کی۔ 1979 میں وہ ریڈیو پاکستان سے پروڈیوسر کے طور پر وابستہ ہوے اور پروگرام منیجر کے عہدے پر ریٹائر ہوئے۔ ان کی ادبی زندگی کا آغاز شاعری سے ہوا جس سے ان کا شغف اب بھی جاری ہے۔ ان کی پہلی طویل کہانی "سائیں موسم" تھی جو 1966 میں فنون، لاہور، میں شائع ہوئی ۔ پہلا ناول *کانی نکاح* 1991 میں پہلی بار انھوں نے خود شائع کیا۔ بعد میں یہ ناول آج کے شمارہ 63 میں دوبارہ شائع کیا گیا۔ اس کے بعد سے خالد طور کی طویل اور مختصر کہانیاں آج میں شائع ہوتی رہی ہیں۔ *بالوں کا گچھا* ان کا وہ ناول ہے جسے انھوں نے برسوں پہلے لکھنا شروع کیا لیکن پھر بددل ہو کر ادھورا چھوڑ دیا۔ اس ناول کو انھوں نے اسی سال مکمل کیا ہے۔ ISBN 978-969-8380-87-8